Posts Tagged ‘Srilanka’

இலங்கை என்றதும் பௌத்தம் நினைவிற்கு வருகிறதோ இல்லையோ , தமிழர்கள் அவர்களின் நிலைமை நினைவிற்கு வந்து விடுகிறது. அதுவும் போருக்குப் பிந்தைய இலங்கையில் தமிழர்களின் நிலைமை என்ன என்பது மில்லியன் டாலர் கேள்வி. பதில்தான் கிடைத்த பாடில்லை!

ஆகத்துப் 17 இல் பாராளுமன்றத் தேர்தலை நடத்தி சர்வதேசத்தில் தன்னை ஜனநாயக நாடாக (ஓரின ஜனநாயகம்) நிலை நிறுத்திக் கொண்டது. ஆனால் தேர்தல் முடிவுகள் யாருக்கும் ஆட்சி அமைக்கும் அளவுக்கு இல்லை. இருந்தாலும் ராஜபக்சேவை இந்தத் தேர்தல் ஓரம் கட்டி உள்ளது, கொஞ்சம் ஆறுதல்.ஆறுதல் தமிழர்களுக்கு மட்டும் அல்ல , சிறிசேனா,ரணில் மற்றும் சந்திரிகாவிற்கும்தான் என்பது சிங்களமே அறிந்த உண்மை.

இந்தத் தேர்தல் ஜனநாயகத்திற்கோ , உலகிற்கோ, தமிழர்களுக்கோ கிடைத்த வெற்றி இல்லை. ராஜபக்சேவைப் பிடிக்காத சிங்கள அரசியல் தலைவர்களுக்கு கிடைத்த வெற்றி. விடுதலைப் புலிகளை அழித்ததை வைத்தே தன்னை நீண்ட காலத்திற்கு தக்க வைத்துக் கொள்ள ராஜபக்சே நினைத்து இருந்ததை மக்கள் தகர்த்தெறிந்துள்ளனர். ஆனால் இந்தத் தோல்வி ஒன்றும் படு தோல்வி இல்லை அவருக்கு. இந்தத் தேர்தலில் அவரும் வெற்றி பெற்றுள்ளார் . அவர் சார்ந்த கட்சியும் கணிசமான வாக்குகளைப் பெற்றுள்ளது என்பதை நாம் மறுப்பதற்கு இல்லை.

ராஜபக்ச| கோப்புப் படம்: ஏ.பி.
விடுதலைப் புலிகள் சிங்கள கட்சிகளுக்கு பெரிய பிரச்னையாக இருந்தது உண்மை. அவர்களை ஒழித்ததை சிங்கள மக்கள் எப்படி எடுத்துக் கொண்டிருக்கிறார்கள் என்பதை விட இந்தத் தேர்தலில் அதனை விடவும் பல காரணங்கள் அந்த மக்களுக்கு இருந்திருக்கிறது என்பது தெரிகிறது. சரி நாம் வேலை அதனை ஆராய்ச்சி செய்வதன்று. அதை அப்படியே சிங்கள மக்களிடம் விட்டு விடலாம்.

நாம் பேச வருவது இதுதான் , 225 உறுப்பினர்களைக் கொண்ட இலங்கை நாடாளுமன்றத்தில், 196 உறுப்பினர்கள் மக்களால் நேரடியாகத் தேர்ந்தெடுக்கப்படுகின்றனர். 29 உறுப்பினர்கள் அவரவர் கட்சிகளுக்குக் கிடைக்கும் வாக்குகளின் வீதப்படி கட்சித் தலைமையால் நியமிக்கப்படுகின்றனர். இந்தத் தேர்தலில் ஐக்கிய தேசியக் கட்சிக்கு 106 இடங்கள் கிடைத்துள்ளன.  தமிழ் தேசியக் கூட்டணிக்கு 16 இடங்கள் கிடைத்துள்ளன. இடதுசாரி சிங்களக் கட்சியான ஜனதா விமுக்த பெரமுன 6 தொகுதி கிடைத்து உள்ளது.

ரணில் ஆட்சி அமைக்க இன்னும் 6 உறுப்பினர்களின் ஆதரவு தேவைப் படுகிறது .தமிழர்கள், முஸ்லிம்கள் போன்ற சிறுபான்மைச் சமூகத்தவர்களின் ஆதரவுடன் ரணில் விக்கிரமசிங்க ஆட்சியமைக்க முடியும். அல்லது ஜனதா விமுக்த பெரமுனாவின் 6 இடங்கள் கொண்டு அவர்கள் ஆட்சி அமைக்க முடியும்.

ஆனால் சற்றும் எதிர்பார்க்காத வகையில் சிறிசேனா கட்சி ரணிலுடன் கை கோர்த்து உள்ளது. ஆம் ரணில் கட்சியும் , சிறிசேனா கட்சியும் 2 ஆண்டுகளுக்கு கூட்டாச்சி செய்ய ஒப்பந்தம் போட்டுள்ளன. தமிழர்கள் இல்லாமல் ஆட்சி செய்வது கூட்டாச்சி என்று எப்படி சொல்ல முடியும் , அது கூட்டாளிகளின் ஆட்சி என்று சொல்வதுதான் சரியாக இருக்க முடியும்.

போர்க் குற்ற விசாரணை , சர்வதேச நாடுகளின் கண்காணிப்பு, பண்டைய சீன ஆதரவு நிலை போன்றவற்றில் இருந்து தன்னை காப்பற்றிக் கொள்ளவும் , இன்றைய அமெரிக்க ஆதரவு நிலைப்பாட்டை உரத்துச் சொல்லவும்தான் இலங்கை இந்தத் தேர்தலைப் பயன்பத்தி உள்ளது என்பது சர்வதேச அரசியல் விமர்சனர்களின் கருத்தாக உள்ளது.

சிறுபான்மையினரை மதிக்காத ஒரு பெரும்பான்மை நாட்டிலே ,தமிழர்களின் மீள் குடியேற்றம்,காணமல் போன தமிழர்களை கண்டுபிடிப்பது ,அரசியல் விடுதலை, தனி நாடு கோரிக்கை, சிங்கள -தமிழ் அரசியல் பகிர்வு,போருக்குப் பின் இலங்கை பொருளாதாரம், சிங்கள பேரினவாதம்,முஸ்லிம்-சிங்கள பிரச்சனை,ராஜபக்சே,சர்வதேச விசாரணை ,உள்நாட்டு விசாரணை ,கூட்டாச்சி என சிறிசேனாவிற்கும் , ரணிலுக்கும் மிகப் பெரிய சவால் இப்பொழுது காத்து இருக்கிறது. சிறிசேனவும் , ரணிலும் அதே பெரும்பான்மை சமூகத்தினர் என்பதும் இங்கே கவனத்தில் கொள்ள வேண்டும். உள்நாட்டுப் போரில் பாதிக்கப் பட்டது தமிழர்களை விட யாரும் பாதிக்கப் பட்டு இருந்திருக்க மாட்டார்கள். அந்தப் போரின் முடிவுகளில் இருந்துபாடம் படிக்க வேண்டியது தமிழர்கள் மட்டும் இல்லை பெரும்பான்மை சிங்களவர்களும்தான்.

இடது ரணில் விக்கிரமசிங்கே, வலது சிறிசேனா
சிறிசேன மற்றும் ரணில் அவர்கள் புதிய நாட்டையும் , அரசியலையும் கட்டி எழுப்புவோம் என்று சொல்லி இருக்கிறார்கள்.ஆனால் சிங்களவர்களை முழுவதுமாக நம்பி விட முடியாது .கடந்த கால வரலாறே அதற்க்குச் சாட்சி.இருந்தும்  தமிழர்களுக்கு இந்தத் தேர்தல் முடிவுகளும் , இந்த ஆட்சியும்  எந்த அளவிற்கு  நன்மை தரும் என்பதைப் பொறுத்திருந்துதான் பார்க்க வேண்டும்.காலமே அதற்க்கு பதில் சொல்லும்.

படங்கள்: தி ஹிந்து தமிழ் , நன்றி!

இலங்கைப் பாராளுமன்றம் கலைப்பு  மற்றும்  அடுத்த தேர்தல்:

இலங்கை பாராளுமன்றம் கலைக்கப் பட்டது , வரும் ஆகத்து 17ல் அங்கே பொதுத் தேர்தல் நடக்க உள்ளது என்ற செய்தி கடந்த வாரம் வெளியாகி உலகத் தமிழர்கள் மட்டுமின்றி , உள்ளூர் நடுநிலை சிங்களவர்கள் மத்தியிலும் ஒரு மகிழ்ச்சியையும் எதிர்பார்ப்பையும் ஏற்ப்படுத்தியது.

எதிர்பார்ப்பும், ஏமாற்றமும்:

ஆனால் நேற்று வெளியான அந்த செய்தி எல்லோர் மனதிலும் ஒருவித சந்தேகத்தையும் , கவலையையும் வெளிப்படுத்தி இருக்கிறது.  ஆம் , நடைபெறவுள்ள பாராளுமன்றத் தேர்தலில் போட்டியிட முன்னாள் ஜனாதிபதி மஹிந்த ராஜபக்ஷவிற்கு ஐக்கிய மக்கள் சுதந்திர முன்னணி அனுமதி என்பதுதான் அந்தச் செய்தி.

நிழலும் , நிஜமும்:

போர் முடிந்து ஓரளவிற்கு அமைதி திரும்பியது என்ற நிலை கொஞ்ச காலம் வரை நீடிக்காது போலத் தெரிகிறது இந்த விடயத்தால்! கடந்த ஜனாதிபதி தேர்தலில் தோற்ற மகிந்த ராஜபக்சே  “தமிழ் மற்றும் தமிழ் பேசும் முஸ்லிம்களால் நான் தோற்கடிக்கப் பட்டேன் , சிங்களவர்கள் மத்தியில் இன்னமும் என் செயல்களின் மேல் நம்பிக்கை உள்ளது” என்று சொன்னவர்(ஆனால் முதல் முறை தமிழர்களின் வாக்குகளால்தான் மகிந்தா ஜனாதிபதியானார் என்பதும்,அதற்க்கு அவர் செய்த கைம்மாறு(கருமாதி)என்ன என்பதும் உலகறிந்த வரலாறு.) . அது இரு முறை ஜனாதிபதியாக இருந்தவர் மக்களின் தேர்தல் முடிவைக் கூட பெருந்தன்மையுடன் ஏற்றுக் கொள்ளாத ஒரு அற்ப அரசியல்வாதி அவர் என்பதை உணர்த்தியது .
கூட்டாளிகளோ?:

மகிந்த ராஜபக்சே போட்டியிட மைத்ரி சிறிசேனாவும் ஆதரவு என்ற செய்திதான் , அனைவரையும் ஆச்சர்யத்தில் ஆழ்த்தி உள்ளது. ஒருவேளை எல்லோரும் கூட்டாளிகளோ என்பது போல நினைக்க வைத்தது இந்த விடயம்! கடந்த தேர்தலில் மகிந்தா தோற்ற பிறகும் பதவி விலக மறுத்தார் அந்த சமயம் ரணில் அவரை சமாதானம் செய்தார் என்ற செய்தியும் ,சமீபத்தில் சிறிசேனாவை மகிந்தா சந்தித்துப் பேசினார் என்றும் படித்தோம் , இதெல்லாம் நமக்கு உள்ள  சந்தேகத்தை மேலும் அதிகமாக்குகிறது.தமிழில் ஒரு பழமொழி சொல்வார்கள் “நான் உன்னை அடிப்பதைப் போல அடிக்கிறேன் , நீ அழுவதைப் போல அழு என்று” அதைப் போல உள்ளது இந்தக் கூட்டணி! இதுவரை இதில் சந்திரிக்காவின் முடிவு என்ன என்பதே தெரியவில்லை , அவருக்கு அங்கே செல்வாக்கு குறைந்து விட்டதா என்றும் நினைக்கத் தோன்றுகிறது.


இனி இருக்குமா அமைதி ?:

சிறிசேனா நிச்சயம் ஒரு சூப்பர் ஹீரோ இல்லை ஆனால் இப்போதைய சூழலில்  மகிந்த ராஜபக்சேவிற்கு ஒரு ஆறுதல் மாற்று என்பதை அவரது நிகழ்கால செயல்களில் இருந்து நாம் அறிந்து கொள்ளலாம்! யுத்தம் முடிந்த இந்த 6 ஆண்டுகளில் சொல்லிக் கொள்ளும் மாற்றம் ஏதும் நிகழாத இந்த வேளையில் மகிந்தாவின் வருகை அனைத்து சமாதன முயற்சிகளையும் முடக்கிவிட வாய்ப்பு உள்ளதாகவே தெரிகிறது.

எதிர்காலம்?!:

ஒருவேளை சிறிசேனா  ஐக்கிய மக்கள் சுதந்திர முன்னணி என்ற கட்சியைப் பாதுகாக்க இந்த விசியத்திற்கு சம்மதம் தெரிவித்து இருக்கலாம் , ஆனால் இது ஐக்கிய மக்கள் சுதந்திர முன்னணி என்ற கட்சியைத் தாண்டி , இலங்கையில் நடந்த கடந்த கால தவறுகளுக்கு தீர்வு சொல்லும் வாய்ப்பாக “மகிந்தாவின் மறு அரசியல் பிரவேசம் அமையாது “என்பது உண்மை. இந்த வேளையில் யுத்தம் முடிந்து சர்வதேச மற்றும் தமிழ் மக்களின் நம்பிக்கையைப் பெற உள்ள கடைசி வாய்ப்பையும் இலங்கை வீணடித்து விடக் கூடாது என்பது அரசியல் நோக்கர்களின் எண்ணம்.


நம்பிக்கை:

அரசன் அன்று கொன்றாலும் , தெய்வம் நின்று கொன்றாலும்! மாற்றம் முடிவு தரும் , அதுவரை நம்பிக்கை கொண்டிருப்போம்!!

படங்கள் உதவி & நன்றி : கூகுள்